মণিপুরদা থোক্লিবা কাংলুপকী ঈরাং
মণিপুরদা হৌজিক থোক্লিবা হিংসাগী থৌদোক অসি লাইবক থিবনি। থৌদোক অসি মতম কুইনা ফুম্না লৈরম্বা, ফুরুপ জাতি কয়াগী মনুংদা নুঙাইনদবা, মোত মানদবা অদুবু লৈঙাকনদি মদু তাইসিনবা ঙমদবনা ঙসি অসিগুম্বা ফিভম অসি য়ৌরকপনি হায়দুনা মিচম প্রজাশিংনা খল্লি। মীচম কয়া শিখ্রে, য়ুম কয়া মৈ থাখ্রে। অঙম্বা মফমদা খুৎকনবা কাংলুপ্তুনা অশোনববু নৈ তাহৎপিখ্রে। লাইবকথিবনি। গ্রেটার মণিপুরদা লৈরিবা মৈতৈ, নাগা, কুকিনা চিংবা অতৈ জাতিশিং পুম্নমক পুকনিং ফাত্থব’মদি মথৌ তাই। হিংসানা হিংসাতমক পুরক্কনি, কৈদৌঙৈদসু অফবা পাওদম পুরক্লোই হায়জনিংই।
মীচম কয়া শিখ্রে, য়ুম কয়া মৈ থাখ্রে
মিডিয়াদগী ফংবা পাউদগী খংবা ঙম্মি, মে'গী তাং ৩ (অহুম)দগী হায়রিবা কাংলুপকী ঈরাং অসি চুরাচান্দপুর, তেংনৌপল, কাংপোকপী জিলাগী মফম খরদগী নুঙাইতবা, থোকহননিংদবা লাইবকথিবা থৌদোক অসি হৌরকখিবনি। তাং ৩ দা ওল ত্রাইবেল স্টুদেন্টস য়ুনিয়ন মণিপুর না শিন্দুনা চিংগী জিলা পুম্নমক্তা মীতৈ/মৈতৈনা এস টি লিষ্টতা য়াওহন্নবা দিমান্ড তৌবগী মায়োক্তা `কম নাও লেট আস রিজন টুগেদর' হায়বা বেন্নরগী মখাদা ত্রাইবেল সোলিদারিটি মর্চ/রেল্লি পাংথোকখিবনি। অয়াম্বা মফমশিংদা শান্তি ওইনা ত্রাইবেল সোলিদারিটি মর্চ/রেল্লি পাংথোকখ্রবসু বোর্দর টাউন ওইরিবা মোরে অমদি মোতবুং এরিয়াদা কাংলুপ অমনা কাংলুপ অমগী য়ুম, দোকান, গাড়ী মৈ থাদুনা মাংহন-তাকহনবা হৌরকপা অমদি মীচম প্রজাশিংনা খাংবা ঙমদনা মপুন্সী কন্নবা মশা মশাগী য়ুম থাদোক্তুনা, লৈকায় থাদোক্তুনা চেন্নখি অদুদগী মথং মথং পাউ তানরকপদগী ইম্ফাল ঈষ্ট অমসুং ইম্ফাল ওয়েষ্ট য়াওনা তম্পাক্কী মফম কয়াদসু হিংসাগী থৌদোক অসি চত্থরকখি। তৌববুদি কাংলুপকী ঈরাং অসি নুমিৎ খরনি য়াম্না কল্লুরবসু হৌজিক্কি ওইনদি খরা নেমথপরকপগুম তৌরে। মণিপুর স্টেট অসিগী সেক্যুরিটিগী থবক সেন্টরনা পায়শিনখিবা অমদি অহেন্বা সেক্যুরিটি ফোর্সেস কয়া পুশিল্লকতুনা হিংসাগী থৌদোক খরা নেমথরকপগুম লৈরে।
গাড়ী মৈ থাদুনা মাংহন-তাকহনবা
মৈতৈনা সিডিউল ট্রাইবতা চনবা চন্দবা হায়বসিগী মায়োক্তা মরম কয়া লৈ, লৈফমসু থোক্লি। মণিপুরদা লৈরিবা জাতি কয়ানা মাগী মাগী মশাগী কান্নবা অদুনা য়ুম্ফম ওইরগা ইস্যু অসিবু ইন্টারপ্রেট তৌনরি। ঐখোয়না হায়নিংবদি, গণতন্ত্র লৈবা লৈপাক অমদা হিরম অমবু হেক য়ানিংদে হায়দুনা, নত্রগা নুংদনা অরোৎপা এজেন্দা অমা থম্লগা মপান্দনা হিরম অমা উৎলগা ওৎ- নৈবগী, মিহাৎ চংহাতপা, য়ুম কৈ মৈ থাবা অমদি পোত চৈ লুট তৌবগি থৌদোক অসি কৈদৌঙৈদসু সাপোর্ট তৌবা য়াদে, কন্দেম তৌই। অদুনা সেন্টর অমদি স্টেট গভর্ণমেন্টনা অতৈসু অকনবা মীৎয়েং চঙদুনা ৱাথোক অসিগী চপচাবা ৱারোইশিন অমা পুরকনবা অমসুং তুং কোয়বা সোলুসন অমা পুরকপা ঙম্নবা হোৎনগদবনি।
0 কমেন্ট:
কমেন্ট তৌবিয়ু